REKEM

IN KLANK

iN SCHRIFT

VERZWÈRING AAN DE VOOT

En ¹dóu zeìt mie mooder: “Wat hèbs dich aan der hand?” “Jah,” zèq ich, “jah mooder, ’t pèèrd heìt mich ²hel gestamp en ich heb ³get aan dèè voot gekrege.” Ich zèq: “Es ër mer neet hiël këpot is.” “Och, ’t zal zoe erg wel neet ziên,” zèèt ze, “⁴Wèts-te wats-te deis?” Zèt dich mer ‘nen ⁵iëker water mèt zaut dat pak dich de pien e-weg” zèèt ze. Dat waor vreuger ’t gebroêk, eh. En ich deeg dat. Mer dat pakde gein pien e-weg, ich meinde dat ich raozend woor van de pien
Ja, ’s anderendaags, ’s mùrges, woor den dokter gehaald. En ⁶dù wèts wie die dokters vreuger waore, dat waor mier ⁷vitternèèr es dokters. En dèè kaom dan, -hee bekeek dat, -hee deeg niks der aan. “Ja, wij zullen bloedzuigers moeten opzetten,” ⁸zag ër. En dóu ⁹voor ër mèt ze ¹⁰vëtuurke truq en dóu ging ‘r bloedzuigers hole, aan ’t hoês. -Hee hau die dao in bokale zitten
Jah, zèt ër mich dao drei bloedzuigers op, eh. Die waore ónder e ¹¹glääske gezèt en die bliêve zoelang zitte tot ze dik gedrónke zien. Jah, en ¹²wie ze dik gedrónke waore, dóu pakden ër ze, -hee ¹³lag ze op ‘nen ¹⁴deepen tëleur en dóu lag ër ze op de kop e bitteke zaut en die ¹⁵spi-jden dat blood oêt, eh. Mer dèèn tëleur waor ¹⁶glaad vol, van ’t blood wat ze getrókken hauwe
’s Anderendaags waor ’t dan good. “Ze hèbbe good gewèrk,” zag ër. Mer ’s anderendaags kaom ër weer. Jah, -hee zèt ¹⁷der-s toch weer derop. Dóu hauw ër zèsendertig derop zitte gehad. Mer dat holp allemaol niks eh. En op ’t lèste waor dat blood, dat waor hiël ¹⁸vergange in mëterie, dèè voot…
...
..
Mer dóu… zit ich ‘ne kier boête, ’t waor al september, zoëlang hau ich al gezete, en dóu kaom ‘ne broeder, van de Passionisten. Die waoren in eh... woë waore die toch erges? E kloëster, neet in Bilzen, enfin van dèè kant toch, eh. En dèè kaome alle jaore es ’t ougs waor en de boeren hauwe ¹⁹gedeerse, dan kaome die veur get kómme te holen, eh
²⁰Dèè kump opgezat, dèè broeder, dóu zeìt ër: “Mooder, wat heìt dèè jóng?” “Jah,” zeìt mie mooder, “dèè heìt ’n verzwering aan dèè voot, -hee kan ’t neet geneze kriêge. “Neet,” zeìt ër, “Laot mich ins kieke derheen. En de mooder maakde dat bein - dèè voot - bloët, eh. “Moederke,” zag ër, “dat zal u nooit genen dokter kunnen genezen,” zag ër. “Neet?” zeìt mie mooder. “Neen, dat is get anders,” zeìt ër. “Gij moogt naar de paters gaan,” zeìt ër...
..

¹toen               ²hard              ³iets
⁴weet je wat je doet               ⁵emmer
⁶je weet hoe     ⁷veearts          ⁸zei hij
⁹reed hij          ¹⁰wagentje     
¹¹ [glèèske] glaasje, hier: glazen dekseltje
¹²als                ¹³legde           ¹⁴diep bord (soepbord)
¹⁵spuwden        ¹⁶tot boven gevuld
¹⁷ervan            ¹⁸vergaan in etter
¹⁹etter              ²⁰gedorsen     ²¹die kwam aanzetten

Uit: “Onuitgegeven verhandeling KULeuven, Knabben Piet, 1970
Oorspronkelijk verteld door Mathieu Gorissen (°1886)"

In dialect neergeschreven door Piet Knabben
Oorspronkelijke spelling werd naar analogie omgezet