HÄSSELS

Verteld en aangeleverd door Bruno Roggen (°1939) in 2022

iN SCHRIFT

Oos maa dèì haa da eegelijk ni ³gjaan da vee gónke drèè keeninge zènge. En da mochte vee zeker ni doewn ⁴moe vee doo woende. Da wõren eegelijk èn diën tìjd, het lèste van de jore ⁵fjààrtig, begin van de jore vìjftig allemól redelìjke erm minse, sommige bè veel ⁶kènger ⁷weì thõös õoch. En zè woo da ni gezeed hèbbe want zìj vond da drèè keeninge gaon zinge, da wõor zoe iet weì bedele

Mah iech troek dan toch m’ne plang. Iech haa kammeràte op schoowl op ‘t college ob-e Gufferslaan en dan vond ich ter toch altèd ‘n pààr dei wilde miêjgaon drèè keeninge-zinge. Vee wõre dan altèd ⁸bè drèèn. Iêne zwarte en vee verkliêden oos e bietje en vee haan ‘n kërtonge staaf

Mah ⁹weì da nèù giêjt, weet ich ni mah èn diën tìjd dus, da wõor eegelijk nog nen erme tìjd, krege vee ¹⁰bekans noewt gêld. De minse dei ós iet goêve, dei goêven ós ofwel ¹¹wa freet, bv. äppelkes deì ze vir de winter bewààrde, ⁷gelèk kõlemännekes of staaräppelkes en soms krege vee õoch e-wa ¹²snók

Mah de frängskes, deì vee ¹³be-t-iê hààlde, dao gónk ‘t eegelijk ni im. Õoch ni eever wa vee krege, ‘t gónk terim da vee da gjaan deje en vee haan eegelijk ni, gie speelgoed of toch mar hiêl weìnig en vee deje da bè veel plezier vir õoch ins iejts te doewn, ¹⁴wa alleman ni dee want rechõöt gezeed, èn-e stad wór ter õoch joenges dee iech ¹⁵kant, mah deì van ¹⁶beëter ààs wõre en dei mochte ginne drèè keeninge gaon zènge

Weì da tiggewõordig giejt weet ich ni. De kènger hèbbe da ne mi ¹⁷vandoewn want deì hèbbe alles wa ze willen, eh. Jaomer genoeg ès veel plezier van vrieger toch verlõre gegaon. Zjis weì oos dialecte moe iech zoe spìjt van hèb en dee iech zoe gjaan ¹⁸kal

¹nieuwe       ²oude        ³graag       ⁴waar
⁵veertig       ⁶kinderen   ⁷zoals        ⁸met drie
⁹hoe dat nu gaat          ¹⁰bijna       ¹¹een beetje fruit
¹²snoep      ¹³verzamelden             ¹⁴wat niet iedereen deed
¹⁵kende      ¹⁶betere ouders/afkomst
¹⁷nodig       ¹⁸spreek              

Auteur Bruno Roggen