gènk

Spreker
Marcel Schrijvers (°1924)

Opnamedatum

18 feb 1999

iN SCHRIFT

SPIÊLE AS KÓJING

Vier den twieden oêrlog in de twintiger en de dertiger joêre ¹goenke vèè as ²kójing nog spiêle achter ‘t gelèèg van Annekes Jang. ‘t Winterslaogveld ³dorste ve nie te ⁴weid ingoën, want dao stond ⁵gin èntig gelèèg, en rond de zandbaerg waös ’t zoe ’n grijzelechtige willernis dat ve ⁶sjou woêre. ⁷Heie vind der dao gin ⁸hee ⁹ne mie want- steet ‘r ¹⁰borstig vol heis

Ós vaoder waös ne jääger en al waos ich mer 'n voust hoêg, toch ¹¹debberde ich ôôf èn tou mit aön. Vèè stroffelde en sjergde doër de Glabbeker hee, de Boejem och de Kamphee. Aof in tou nó Geliêre doër het érmebos tot aon den Haoverwèèg en Paopendaol. ’t Wit peìrd en Ziêtele koemen ooch al ins aon de biert. As vaoder nie te veel tijd haa, trokke vë nó Stole Bem, ’t Gënen, Britheeke en mossele op den Hosterd aön. In den hoêgen halm zoeg-de mich bekan nie loope, zoe kleen waös ich nog. ’s Mèrges waös dèèn halm kleddernaot en zoeg ich dek out wei ’n verzoëpe kat. Ich haa përtáng këtsjoë stiefelkes aön en kneiläpkes van e stèk aân ottoband gemaok. Mae da kos nie bôôte. De gesjoëte haoze mos ich omhoêg hage, dat ze nie eever de grônd sleepde, aners woerte ze te zier begaoid en kos ich de hon nie va mich ôôf hage. As ’t te wérm wèèr waös, stoeke ve de haöze in e kaarspoër och tèsse de dennekes. Nouw vind der gee kaarspoër ne mie, zwijg stil van haöze. Iëveral stoën te veel hèis. Gènk veranert mèt den daog en de minsen ooch
Ich geleef nie dat de kójing nog koêgels goën zikke op den Dam och ¹¹eekeenkes sjiete mèt de ¹²flits (och as der wilt mèt den ¹²trèkslinger) en ziêker ne mie mèt de windkarbien
Onder de groete vakantie goenke vèè ¹³bekan alle daog van Outenhoeve op Hengel aof. Lengst ¹⁴de roet raopde ve ós ¹⁵boksmaöle vol ¹⁶steen en dan lopend- en ¹⁷hippentère de hee iêver, dat ós kneie ¹⁸roed gesjaad woêre. Mèng, de gard van Hengel, waös dò ¹⁹eil nie mèt opgezatte, meh dao vèègde vèè vierkantig ²⁰ós varsen aön
In ‘t noejoêr knipperde ve ooch këstaonjele aof en as ër dan achter oos koem, ²¹bisde ve wei de dief-enkers en ²²verstoeken ós tèsse de liêg dennekes en achter de ²³streik. Iemmers këstaonjele en noëte hemme ve geraopt. Kroewaoges eekeenkes gesjoëte en kare steen Hengel opgeslèèpt

As ve ‘s oëves stikkapot thous aönkoeme, oete ve ²⁴tëliere pap mèt brokke en aof en tou ins ’n snee zwârt broed mèt ²⁵sjónk och ²⁶kroppout, en dat smaokde

Auteur Marcel Schrijvers

¹gingen wij                 ²kwajongens        ³durfden
⁴ver                           ⁵geen enkel          ⁶bang
⁷nu, lett. hier              ⁸heide                 ⁹t(niet) meer
¹⁰barstensvol met huizen              ¹¹eekhoorntjes
¹²katapult                  ¹³bijna                 ¹⁴de spoorweg
¹⁵broekzakken            ¹⁶stenen (mv)      ¹⁷al huppelend
¹⁸rood geschaafd        ¹⁹eigenlijk niet mee opgezet
²⁰onze voeten, lett. hielen    ²¹vluchtten we zoals rakkers
²²verstopten               ²³struiken (mv)
²⁴(eet)borden             ²⁵ham
²⁶streekgerecht: varkensbloed verdikt met
   boekweitbloem om in schijven te bakken